近日股市又旺番，係時候將啲IPO建議書攞番出嚟，絲絲老友話，富昌證券最近頻頻向其他證券行挖「大經紀」，唔知係咪搞上市？
絲絲與富昌證券總經理藺常念好熟，梗係直接問吓呢位大佬有冇上市消息啦，點知佢聽完絲絲講，就笑住咁話：「上市？我唔答得你呢個問題，總之冇答案。」
之不過，佢就承認有做行內嘅正常活動──挖角。市場傳聞話，富昌證券頻頻向其他證券行挖「大經紀」，聽聞只要經紀一過檔，就即刻送上一萬蚊大利是。藺Sir坦言公司一直都有搵人過檔，二月份就有4、5個大經紀加盟，三月份就好似冇。
不過佢澄清：「總之大經紀頭3個月嘅總成交額過咗某個數，我哋就會派利是，最少係一萬蚊，最多梗係唔講得啦，商業秘密吖嘛。總之我哋撬人走，人哋又撬番我哋啲人走，呢個社會好公平嘅，價高者得嘛。不過大家唔使撬我，因為我實唔會走嘅！」
余絲韻