姚明魅力果然沒法擋！話說中國人壽（海外）慶祝成立25周年，請咗一班得獎客戶去美國睇NBA比賽，當佢哋去拎簽證嗰陣，領事館啲人問其中一個得獎客戶去美國做乜，佢就話去睇波，於是領事館問佢識邊個球星，佢就話淨係識得姚明，咁就通過咗出名麻煩嘅拎簽證程序。
國壽（海外）安排睇嘅比賽係休斯頓火箭對洛杉磯湖人，可惜姚明傷咗都有一段時間，要下季至可以復出，所以佢哋淨係可以睇到姚明坐喺後備席，雖然睇唔到姚明場上英姿，但都可以睇高比拜仁補數。
作為國壽代言人嘅姚明都有坐低與得獎客戶傾吓偈，姚明仲特登叫咗經理人帶大家去自己喺休斯頓開嘅中菜餐廳食餐勁添。
唔講唔知，原來國壽（海外）總裁劉廷安喺國壽（02628）嗰陣，就係佢負責同姚明拍廣告，所以兩人一早好老友，今次劉總雖然唔得閒去美國，但佢都託咗人帶份小禮物，送畀姚明就嚟出世嘅囡囡添。
余絲韻