邀選美佳麗跳舞
絲絲聽聞證券學會前會長張華峰事前已放風話當晚有神秘節目，所講嘅原來係佢大玩噱頭，邀請咗歌唱比賽冠軍以及一班選美佳麗嚟表演，仲搵咗棟篤笑名人娛賓，令在場嘉賓捧腹大笑。
前晚證券學會晚宴筵開三十五圍，主禮嘉賓包括詹培忠、夏佳理、李小加及陳家強等，張華峰話，原本嘅構思係請班佳麗上台表現跳舞時，搵嘉賓「伴舞」，但各人都有啲怕醜，所以一眾佳麗惟有自己搵嚟「拍乸」伴舞。
唔講唔知，呢個咁豐富嘅綜合表演節目，原來係由張華峰出錢出力贊助表演費，至於其他理事，當然亦有贊助其他獎品。證券學會新一屆理事包括會長李細燕，以及副會長朱李月華、余維強、李愛平及陳杏禮。
余絲韻