絲絲講場：花旗大學生力軍60人畢業
隨着經濟復甦，金融市場一直出現人才荒，銀行界高薪挖角時有所聞，花旗香港一向好積極培養「青年軍」，佢哋一年一度與大學合作嘅銀行課程就喺尋日舉行畢業禮。今年中文大學有六十位同學仔畢業，其中四位精英仲可以去花旗銀行喺亞太區唔同城市嘅辦事處實習，度過一個有好多嘢學嘅暑假。
新一年課程轉場港大
絲絲尋日見到花旗香港環球個人銀行服務行政總裁兼總經理盧韋柏（Weber），佢話時間真係過得快，五個月前仲同一班同學仔講緊，要一齊重建公眾對銀行界嘅信心，依家已經睇住佢哋已經畢業。佢仲話依家成日收到以前喺呢個課程畢業同學嘅感謝信，感到十分自豪。
Weber仲透露，佢哋與中大合作呢個課程三年，下年會轉場返去港大搞，仲話與每一間大學都會合作唔同嘅活動。至於近期市場咁波動，絲絲問佢嚟緊嘅課程會有啲乜嘢新元素，佢就用花旗香港財資部及風險管理部門做比喻，話個市場變成點，佢哋就會加入有關新元素配合個課程，認真非常貼市。
余絲韻