港股升逾千點後，昨日終見回吐，但沽壓唔算嚴重，只要仍有資金流入，後市仍向好。不過，詩詩呢幾日手風唔多順，要減減舊貨重新再部署。中國木業（00269）以均價0.141元沽出300萬股，集中火力再加碼杏林醫療（08130），早段見股價一度跌穿0.1元，但好明顯係震倉，以每股0.099元再買入200萬股，一於同佢博過。
大市回氣，股仔又落鑊，詩詩都係炒開細價股，見新時代能源（00166）靜極思動，成交顯著回升，可能隨時開車。新時代較早前宣布以6億元收購昌運控股，此公司間接持有宏文黃金90%權益，其業務範圍包括開採、精煉及銷售黃金，其擁有3個位於河北省青龍滿族自治縣之金礦，估計含金礦石資源約390萬噸（金質金屬數量約2.1萬千克）。
如完成收購兩年內，該等金礦的黃金資源達至或超過JORC（澳洲準則）之推定資源水平逾50噸，新時代須發行額外新股約2.94億股予賣方，每股作價0.34元，相當於1億元；而賣方同意不會於獲配新股後三個月內出售。昨日新時代收報0.345元，雖然金礦未能即時為集團帶來盈利貢獻，但最近金價上升，料可成為推動股價的催化劑。
詩詩