俄鋁（00486）尋日公布上市後首份成績表，俄國富豪老闆歐柏嘉（Oleg Deripaska）都畀面嚟到香港出席記者會，不過畀傳媒朋友問到點解俄鋁股價「長期潛水」時，佢就苦笑話「Very difficult（好難答）」，連佢自己都唔明白。咦？好似好撲朔迷離咁喎。
俄鋁控股公司ＥＮ+集團尋日啱啱公布，大股東歐柏嘉親身上陣擔任公司行政總裁，而俄鋁上市後第一份業績亦轉虧為盈，本來喜事重重就應該好高興，不過俄鋁股價上市後一直「潛水」，尋日雖然升咗百分之○點八，收報九點四八元，但比起上市價十點八元仲低出超過一成。
尋日俄鋁記者會自然會問到股價，歐柏嘉起初當聽唔到，到後來再有記者問佢點解俄鋁股價咁殘，佢終於苦笑一下，然後話呢個問題「Very difficult」，話佢都唔知道；不過佢話俄鋁上市只不過係兩個月嘅事，咁短時間好難反映到啲乜嘢，自己同管理層會努力做嘢，公司未來一定可以交到份靚靚成績表畀股東睇，所以對未來股價「Positive（樂觀）」喎。
余絲韻