李寧（02331）近年業務愈做愈好，去年仲砌低Adidas，成為內地體育用品嘅一哥，「體操王子」李寧今次就夥拍兄長李進，私人以7億元收購一間創業板嘅綠色能源企業快意節能（08032），呢間公司原本寂寂無聞，當公布咗李寧入股計劃後，股價尋日即狂升132%。
絲絲聽朋友講，快意節能係做節省能源嘅空調和熱水器，又做西藥及中藥貿易。尋日呢間公司發布公告，向李寧私人以及其兄長李進持股嘅一家公司以每股0.073元發行54.79億股優先股，代價4億元，同時公司再發行3億元可換股債券（CB）注資，CB換股價為0.073元，若優先股及CB全部獲兌換，李寧兄弟將持有呢間公司83.14%股權。快意節能話今次可利用李寧嘅聲譽喺中國作宣傳，而集資主要用喺現有綠色能源業務以及其他業務，亦會引入運動相關業務，但話明唔係運動服裝、鞋具及設備業務。
不過李寧公司方面話，今次入股係李寧嘅私人投資，與李寧公司無關，李寧係公司嘅大股東，會繼續專注公司業務。依家潮流興環保，李寧兩兄弟睇準時機收購綠色能源企業，可以做環保先鋒。
余絲韻