孖妹缸湖遊：細路買股唔係小兒科

11歲Toby 大市高位再跌先買

年齡：11歲

投資經驗︰約兩年，上周買賣南航（01055）實賺約7,000元

從小開始學理財應該係一件好事，「股神」巴菲特喺11歲時買下人生第一張股票，《富爸爸‧窮爸爸》作者羅伯特‧清崎9歲時透過玩大富翁學習點樣致富。事先聲明，今次孖妹請嚟兩位細路哥Toby和Ian談股論經，目的唔係追捧「神童熱」，只係見到恒指升穿22,000點，藉着小朋友講番3歲細路都識嘅投資態度，希望股友唔好咁草率入市，當輸錢係小兒科。

11歲嘅Toby最鍾意打乒乓波和睇歷史課外書，因為家庭教育以及哥哥讀數學博士，佢喺8歲時已知股票為何物、旅行後識計加元升到幾多換番港紙先抵、每朝早睇財經新聞、拎媽咪嘅iPhone上網查報價……早排恒指連升幾日，佢就敦促媽咪快啲放咗啲股票。

趁世博買南航有賺

莉莉︰你第一隻買嘅股票係乜？

Toby︰我知道媽咪有幫我買港鐵（00066）和中行（03988），但我第一隻話買嘅係南航（01055），因為遲啲有世博，好多人會飛去上海。（在旁嘅媽咪鄭太補充話，南航喺2.7元買入，3.69元沽出，賺咗約7,000元，Toby聽咗好驚喜話賺咁多！）

高妹︰賺到嘅錢打算用嚟做乜？

Toby︰我只會拎100蚊出嚟，但唔會用晒，每次用二、三十蚊，買啲鍾意嘅嘢或者零食，其他賺到嘅錢就擺喺銀行儲埋，剩低嘅本錢會再買股票。同埋等到再有錢啲，可以買樓畀父母住、買車、買番自己冇得玩嘅玩具例如Wii。

莉莉︰依家恒指算唔算喺高位？

Toby︰我知道之前去過3萬點，但我未見過，開始買股票時恒指只有16,000點左右，所以依家恒指喺高位，我唔會買貨住，等再跌先買。南航應該唔會跌番落2.7元，大約跌到3蚊就買。

股票冇感情可唔要

高妹︰點解股票日升日跌，玩具價錢又唔會咁呢？

Toby︰有壞消息時會跌，有好消息會升，仲有每隻股票一定有平均成交量，高過或者低過都會有影響。雖然嗲哋媽咪教股票要揸長啲，但我覺得波幅買賣（趨勢投資法）勝過長揸，長線賺得冇咁多，自己又好心急，升得太過高會擔心，大約揸兩星期就想放，有幾千蚊都好滿足。（鄭太話，南航3.5元時Toby嗌住想放，但佢叫Toby等多一日，最終都有聽佢意見。）

莉莉︰儲埋咁多錢會幾時拎出嚟用？

Toby︰等廿七、八歲拎出嚟用，將來想做生意，又想做歷史學家，又想做買樓買賣生意，因為鍾意凱旋門，環境好又出名。（咁歷史學家呢？）有辦法！退休後先做。

高妹︰你鍾意買樓抑或買股票？

Toby︰買股票平好多，幾萬蚊就買到，買樓可以賺得多啲，但本錢要好多，應該要1,000萬。不過買股票贏錢有運氣成分，好似南航未到世博都會跌，同埋媽咪話股樓有循環，樓跌始終拖累所有嘢一齊跌，跌市嗰陣會休息下，唔掂股票。我都有儲好多郵票，但唔捨得賣出去，股票冇感情，可以唔要。

7歲Ian 利是錢交媽咪買股

年齡：7歲

投資組合︰滙控（00005）和現金

7歲嘅Ian係家中獨子，興趣係踢波，平時唔會亂使錢，亦好少接觸真錢，喺學校買嘢食都只係問媽咪拎購物券，因為學校小食部用購物券交易。佢唔識講股，但都知要儲錢等大個咗可以用，佢知道媽咪會將自己每年嘅利是錢存落嚟，並買下一隻股票（媽咪之後講番係滙控（00005））。

高妹︰股票係乜嚟㗎？

Ian︰股票應該係值錢嘅，但唔夠樓貴。買樓要先畀幾萬蚊，股票就幾千蚊，依家啲樓好貴（Ian知道樓價高，媽咪透露，係因為佢平時喺屋企同丈夫講樓講得多）。

莉莉︰錢、股票和樓你會揀邊樣？

Ian︰我想要樓多啲，想買私人樓，可以同家人住，要有游泳池、Clubhouse（會所），可以做Gym（健身）同埋去Playroom（遊戲室）玩，可以同朋友去玩。錢可以買好多嘢，股票就冇咁有用。

高妹︰你想用錢嚟買啲乜？

Ian︰我依家唔會買嘢，我想儲錢，等大個咗廿幾歲時拎出嚟買屋，好似嗲哋媽咪咁，細個時儲起啲利是錢，可以買到屋。

莉莉︰依家可以點樣賺錢？

Ian︰自己乖或者攞滿分，同埋喺新年就可以有錢。大個仔後可以做公司老闆，因為做得好可以上電視，可以Famous（出名）啲，想做歌星陳奕迅，因為佢唱歌好好聽。

心理學家：灌輸金錢觀

依家係咪真係好多小學生自己投資？孖妹就請教註冊輔導心理學家萬家輝，佢話愈嚟愈多小朋友買賣股票，多數就讀小學高年班，通常係父母畀錢仔女買股票，但唔好過分鼓吹炒股。自從八達通卡通行後，電子貨幣成為潮流，小朋友好少知道自己口袋仲剩幾多錢，諗起要買乜，拎張卡出嚟「嘟一嘟」就得；同樣地，佢哋對賺蝕概念好模糊，唔清楚一買一賣、一升一跌代表幾多錢，只知道開電腦就搵到股票報價。

44.3%人料股指期貨利港股

內地嘅股指期貨喺本周五出台，睇番國企股已大約佔咗恒指成分股半壁江山，內地股指期貨推出後對港股有乜影響？據今期《東方產經》網上民意調查，截至上周末晚上6時，認為利好及影響不大嘅分別佔44.3%和30%，認為利淡就有25.7%。

（高妹）（莉莉）

若有料報畀高妹同莉莉或有嘢問，可電郵money.biz@opg.com.hk