市場熱線：聯通再展升浪
花旗魚缸上周五繼續做好，道指更一度突破萬一點。至於本地魚缸重磅股ADR在當晚普遍上升，大笨象（00005）跟祖國移動（00941）升勢持續，但「油魔」回氣，中石油（00857）及中海油（00883）則逆市向下。至於本地魚缸在上周五極之威水，當日恒指以1.5%漲幅，跑贏亞太區內其他魚缸。好友在復活節假後發動攻勢，上周僅三個交易日，挾高恒指逾千點，好友得勢不饒人，古勝相信本地魚缸本周升勢可持續，恒指可望挑戰22,500至22,700點水平。
人仔升值係上周好友挾淡倉藉口，但祖國三月份貿易逆差達72億美元，人仔升值存在變數，睇樣好友要另尋藉口挾淡倉。古勝則認為佛國政局動盪，周末期間更以武力鎮壓示威者，發生流血衝突，將吸引更多熱錢流入本地魚缸避險。
中移回購利股價
兩巨無霸大隻佬終發力，古勝早已建議看官要留意祖國移動，集團坐擁逾2,000億元人仔淨現金，加上每年超過2,000億元人仔的現金流，在人仔升值憧憬下，祖國移動自然水漲船高。另一方面，祖移日前發聲明，表示擬回購不超過10%的股份，最多為20.06億股，如果全部回購，最多需1,532.6億元資金，單係呢一點，已成為強化股價的最大動力。由於祖移已衝破78元阻力位，睇嚟至少要上試82元才需要抖氣。至於另一升市功臣非大笨象莫屬，單在上周五升逾3%，已為恒指帶來近百點進帳，成交額更顯著上升，股價突破81.9元後，料可更上一層樓。
要數落後大隻佬，二奶電話（00762）係其中之一，上周五開始發力，新一輪升浪展開。繼祖國移動入股浦發錢莊後，二奶電話亦加入戰團，雖然未有本錢入股紅色錢莊，但卻與交行（03328）簽訂戰略合作協議，發展手機銀行業務。二奶電話表示，雙方合作可實現金融業和通訊業的協同發展，達致雙贏局面。流動電話商近期積極發展電子商貿或手機付費服務，能否為公司帶來更大的效益及盈利，暫時仍屬未知數，但呢一瓣業務展開，卻肯定係一個新商機。睇番上周二奶電話股價表現回勇，好明顯有資金流入追捧，況且集團去年第四季的業績已見底，今年業績會按季改善。
盈利能力有改善
二奶電話在3G手機戰事上，對客戶費用、補貼及資本開支的策略採取較審慎態度，估計今年首季手機業務虧損大為減少，而行業整體業務盈利能力也有改善。二奶電話管理層早前表示，3GWCDMA供應鏈可令集團受惠，並取得合理增長，多於採取風險較高的補貼政策，直接將價值由行業轉嫁消費者，估計服務收費及補貼政策不會過於進取，呢個策略有望令二奶電話跑贏同業。
古勝