內地呢幾日會唔會公布人民幣升值係全球矚目嘅事，有人估只會係匯率改革，形式類似○五年嗰套，但冇咗一次過升值2%呢Part。咁啱得咁蹺，○五年逼人民幣升值嘅一班前朝美國官員竟然齊集喺大陸，更有趣嘅係前後3位財長都喺度，你話呢啲係咪巧合？
當年逼人民幣升值嘅，唔少得美國前總統喬治布殊及前財長斯諾，佢哋去咗大陸出席論壇；至於由布殊主政以至奧巴馬年代，都站喺台前「叫陣」嘅紐約州參議員舒默（Charles Schumer），就繼續穩守美國，日日叫人民幣升值。
斯諾依家對大陸和善咗好多，佢嘅繼任人保爾森更出咗名係大陸嘅好朋友，佢一去到大陸就接受央視訪問，大力提倡彈性匯率對中國嘅好處，之後就前往海南出席論壇。保爾森嘅繼任人即係現任財長蓋特納，本周突然旋風式訪問香港及大陸，成功將全世界目光聚焦。
假如話美國呢批前朝官員到訪中國，與蓋特納訪華只係時間上嘅巧合，咁呢種巧合就絕對好罕見。姑勿論係巧合與否，重要人物齊集一個地方，肯定會擦出新聞火花。
余絲韻