農行上市程序進行得如火如荼，一眾投行爭到頭崩額裂之際，公關席位爭奪戰亦已展開。絲絲收到風，早前協助民生銀行（01988）上市嘅皓天財經跑出嘅呼聲最高，聽講只差臨門一腳，簽埋約就掂。
之前21間投行爭做農行承銷團，之不過咁大額嘅上市集資，承銷團坐多幾個位都仲得，但係公關公司就只會請一間，所以候選公司一般都只有2至3間，最多5間，相信亦都已經做晒選美，依家就係等簽約公布結果，據聞大熱門係皓天財經。
其實皓天做內銀上市好有經驗，依家7隻內銀股中，中信行（00998）、招行（03968）以及半年前上市嘅民行都係由佢哋負責上市工作宣傳。
不過，佢哋嘅對手哲基傑訊實力都好強勁，曾經負責工行（01398）、中行（03988）及交行（03328）上市，間間都係全國前列大行。
但市場人士話，正因為哲基傑訊仲負責緊工行及中行宣傳，農行可能會因此而唔想搵佢哋安排，以免敵方知道自己軍情喎。
余絲韻