近年內地企業都諗盡辦法「走出去」，講嘅當然係到海外收購，既能吸納海外品牌及客戶，亦可吸收外國嘅管理及營運經驗，但講到尾，最重要都係想話畀全世界知，佢哋有能力收購海外公司。
新希望集團董事長劉永好提到國際化，佢話其實新希望喺外國會更加好搵，投資回報率會高一倍，但佢哋從來無收購大型企業，佢仲話非常敬佩剛收購富豪汽車嘅吉利集團董事長李書福嘅膽量和勇氣，認為佢係值得每一位民營企業家學習嘅對象。
劉永好又話，敢於走出去意味着中國民營企業嘅群體逐步成熟，因為海外大型企業較好嘅品牌及研究隊伍的確值得中國民企學習，佢仲想引進日本嘅廠長嚟管理新希望喺中國嘅廠房，因為日本企業嘅管理有優勢。
佢又建議民企應該考慮走出去，「今天不考慮，明天也要考慮，明天考慮不如今天考慮，考慮的時間還長一些。」
被問到捨唔捨得賣自己嘅企業，佢打趣話自己養豬，豬長大始終要賣，但從感情上始終係難以接受。
余絲韻