唔少財金界人士都推介絲絲，上市公司年報絕對係一本可讀性甚高嘅財經讀物，不過佢哋通常都會附送一句：「不過會好鬼悶㗎！」的而且確，每年三、四月，都係上市公司出年報嘅高峰期，絲絲都會特別留意上市公司高層嘅人工，但其他嘅嘢又真係幾鬼悶。
中電信（00728）今年就搞吓新意思，為配合公司創新及追上潮流嘅風格，○九年年報就引用咗最新嘅增強實境（Augmented Reality）科技，融合傳統媒體及最先進嘅現代科技，以突出年報「引領變革」嘅主題。
Augmented Reality係物聯網嘅一項應用，喺外國嘅營銷推廣應用方面非常受歡迎，中電信股東會隨年報收到一書籤，只要將印有中電信Logo嘅書籤對住電腦嘅Web cam（網絡攝錄機），中電信嘅網頁就會播出一段3D動畫，表達公司全業務經營所帶來嘅新景象及前景。雖然呢項技術喺外國已經好流行，但喺香港就好似仲未普及，今次中電信引用喺年報上，都算係上市公司首創。
順帶一提，中電信董事長王曉初因獎金減少以及冇咗股份基礎報酬，去年收入較前一年少咗61%，只有73.4萬人仔。
余絲韻