孖妹缸湖遊：王浵世以股為鑑

滙豐老臣 民行前行長

不如介紹一下王總先啦，原來佢同滙豐好有淵源，佢喺七十年代初加入滙豐，九七年擔任滙豐中國業務部總裁，二○○○年率領滙豐中國業務總部由香港搬去上海，成立滙豐駐中國嘅代表處，同時兼任總代表。王總喺滙豐一做就32年，直到55歲先至離開，足見彼此關係深厚。喺○六年，王總被邀請加入民生銀行，成為第一個喺內地股份制銀行做行長嘅香港人，常駐北京，一做就3年，直至去年退休。

莉莉：嘩！你真係滙豐嘅老臣子喎，一做就32年。

王總：其實滙豐真係好適合我，因為我份人比較「土」，同以前嘅滙豐好似。記得以前我要去啲類似銀行公會嘅飯局，通常都會有好多行家出席，但我永遠唔使其他人話我知，邊一張枱係滙豐嘅，因為我一睇啲人嘅衣着和髮型就認得出，而且大家個樣會比較殘，因為做嘢好搏命。

高妹：去年滙豐宣布供股，你有乜特別感受呀？

王總：我唔覺得呢件係悲傷嘅事，事實上當時滙豐喺資本上係需要補足，不過站在投資者角度，佢哋會有啲傷感同不安，首先係股價跌到落30幾蚊，手上嘅股票貶值咗；而且仲要再拎錢去供股，多多少少都會有啲唔安樂。

莉莉：不過滙豐始終受香港人歡迎，大家冇諗過佢會跌到咁低價嘛！

王總：今次事件確實會令到一般人有啲措手不及，因為滙豐一直都話唔需要集資供股，但之後又話要。不過投資者可以選擇唔供股，但你唔供咪蝕底囉！

卅幾年前3萬蚊買教訓

高妹：算啦，都過咗去喇，不如講吓以前啲人鍾唔鍾意買股票？

王總：喺七幾年時差唔多所有香港人都將自己收埋喺「籠底」嘅錢拎去投資，真係可以用「瞓身」去形容，但後來股災一到，每個人都輸到趴喺度。

高妹：咁你有冇「中招」呀？

王總：記得當時我同朋友夾份買咗一手大型股份，當時嘅股價約33元，以2,000股為一手，大約用咗33,000元。點知其後股價跌到落1蚊多啲，結果我同自己講：「算啦，唔好再諗佢會上番30蚊喇。」沽咗貨之後，我就決定以後都唔再玩股票嘞。

莉莉：原來當年你同其他股友一樣，都試過投資失利。

王總：所以你可想像到，你買呢隻股票，佢買嗰隻股票，點知最後人人都輸錢。當年我輸咗三萬幾蚊，但有人可能係輸三十幾萬！

高妹：不過投資愈早經歷挫折唔係愈好咩？早啲知道自己犯乜嘢錯嘛！

王總：唔一定嘅，你冇經歷過仲好啦！好似我咁嘅經歷咪慘囉。

難摒除心魔 重複犯錯

高妹：咁你咪好心痛？

王總：直頭係心死啦，所以咪唔再玩囉。嗰陣時大家嘅人工都好少，當你輸晒成副身家，真係可以叫做冇晒希望。

莉莉：唔怪得你話唔識講投資心得啦！

王總：投資要做止蝕，但好多人都做唔到，因為大家會有心魔，我都唔例外。而且投資時通常出現一個心理，就係當隻股票一蝕錢時，你就會去溝貨，結果愈溝愈跌。

高妹：唉！買股票真係難，想隻股票「返家鄉」就更難。

王總：其實當大家面對一個高指標時，自然會產生管理上嘅問題。例如當我要求你一個月要做到30個訪問，為咗完成目標，你可能會隨便喺條街度搵人去做，咁樣質素咪可能會變差囉，你明唔明白呢個道理？

莉莉：有時候我都諗過，不如「斬手指」唔再玩股票算嘞。

王總：除非嗰次投資失敗令你好刻骨銘心，否則好似細路仔玩火，喺未畀火燒過之前都唔會知道乜嘢叫做痛，所以依然會繼續玩火，人係會不斷咁去犯錯㗎。

滙控季跌11%藍籌尾二

講開又講，今年首季計埋愚人節，滙控（00005）表現喺藍籌股排尾二，下跌11.24%，似足一隻「吸濕大笨象」，吸走咗股東唔少水。問番魚缸散戶，由於上周好多股票有突破，大家仲未得閒買滙控追落後。股友袁太就話︰「以前滙控跌，成個世界都會變，打工仔失業、冇飯開、冇水飲，所以當時借錢都會撈底。依家冇以前咁風光，去唔到100蚊㗎喇，等跌多少少先買啦，但一定唔會跌到70蚊！」

68%市民唔考慮買樓

長和系主席李嘉誠喺去年建議有閒錢嘅市民可以考慮買樓，今年就改口風勸喻投資要小心，咁仲有幾多人會去買樓呢？據今期《東方產經》網上民調，截至昨晚6時，有68.2%嘅人話唔會買樓，而話會買樓嘅就只有31.8%，可見「超人效應」又再一次應驗。

高妹、莉莉

若有料報畀高妹同莉莉或有嘢問，可電郵money.biz@opg.com.hk