市場熱線：中行追落後首選

「高佬盛」唱好紅色分子，吹水報告指稱H股係「新的投資焦點」，預期國企指數今年底至少升兩成至15,000點，更樂觀一點，國指可高見萬七關。至於古勝一向認為三月本地魚缸踏入業績期會做好，即使三月未能先聲奪人，相信在四月份，困擾紅色錢莊的融資不明朗因素消除後，可帶動本地魚缸成功衝破二萬二關，甚至22,500點水平。長假前，恒指收報21,537點，升297點或1.4%；國企指數收報12,696點，升298點或2.4%，跑贏大市。

外圍魚缸全面做好

至於歐美魚缸持續向上，道指隔晚終衝破10,950點，直指萬一大關，歐洲魚缸亦全線上升，在花旗魚缸掛牌的本地魚缸ADR，亦全面向上。「大魔頭」的MSCI亞太指數推高至逾19個月高位；期油及銅價延續近期升浪，分別衝上18個月及20個月新高。「油魔」重拾活力，紐約期油重上86美元一桶，石油股在ADR股價上升。大笨象（00005）亦先偷步重上80元，祖國移動（00941）則較本地魚缸長假期前散場價升近1%，折合ADR成員升幅，恒指約升300點，進一步逼近二萬二。

至於祖國魚缸，在實施融資融券後，暫未見有任何重大突破，甚至有祖國缸邊友擔心，月中當股指期貨推出，大戶又會興風作浪。在下則認為參考過往當有魚缸推出股指期貨，至少魚缸會先上升，好似本地魚缸跟東瀛魚缸，股指期貨推出後，都係先炒上。炒上閒閒哋需時兩三個月，即使之後插水，仆直前仍有幾個月時間搵食。當然古勝唔希望祖國魚缸行東瀛魚缸條舊路，瘋狂炒上後，至今仍未重返當年高位。況且古勝對祖國經濟有信心，在復甦的路途上，北大人會一直留意情況，唔容許有太大的泡沫形成，相信祖國魚缸係唔會學似東瀛魚缸咁大鑊。

本地魚缸假前得以重上二萬一，紅色錢莊功不可沒，在上星期相關個股一周累升5%至10%，主要係幾間重量級紅色錢莊，包括工行（01398）及中行（03988），已公布其融資計劃，至於建行（00939）亦表示在今年底或明年初進行集資，強化資本。

幾間紅色錢莊，古勝一直睇好，呢期則偏愛中行，皆因中行去年把握機會擴張，在幾間國有錢莊中表現最為進取，即使今年北大人主張繼續收緊信貸，中行已「過咗海係神仙」，所受影響有限。

估值吸引力勝一籌

集團去年的信用卡貸款餘額達247.02億元，而新增部分則達141億元，升幅132.4%，為四大行中升幅最大。至於一直受淨息差收窄影響的紅色錢莊，又以中行僅跌2.5%表現最佳，遠較建行及工行分別跌5.8%及6.5%少。估值方面，一○年中行的預測市盈率為9.43倍，建行為9.72倍，工行的10.95倍最高。預測市帳率中行只有1.61倍，建行及工行分別為2.09倍及2.23倍，又係中行贏咗呢一個回合。以現股價計算，中行計落有較大上升空間，短期值得睇高一線。

古勝