孖妹缸湖遊：對沖猛人散播錢途

「金融傳道人」看化投資

提起錢志健（Ed），佢就真係威水，喺二○○○年獲全球最大型對沖基金公司之一嘅Man Investments邀請擔任香港區域主管，管理逾100億元資產。Ed有廿幾年操盤經驗，身為基督徒嘅佢，平時就最鍾意一邊講投資，一邊講耶穌（聖經），所以有「金融傳道人」嘅稱號。仲有唔夠一個月就42歲嘅Ed話：「如果我只有70歲命，咁我已經行咗一半，人生中仲有7,000多個交易日，但我唔會日日坐喺個Mon面前睇市，咁樣好戇居，反而係要諗吓，點樣先可以活得更有意義？」

孖妹之前去咗睇《歲月神偷》，好記得吳君如講「一步難，一步佳」嘅道理，即係話人生唔會永遠順境，但亦唔會永遠逆境。股友唔好以為Ed背景咁勁，投資一定天下無敵，永冇失手，其實之前佢有隻基金係由雷曼兄弟做Prime Broker（主要經紀），所以雷曼倒下，其基金資產亦被凍結。不過，生性樂觀嘅Ed就笑住話：「如果你嘅身家、性命、財產甚至連寵物都當咗畀雷曼，咁你咪會死囉！」

放大圖片

放大圖片

買一、兩隻股票唔Work

Ed：錢志健

莉莉：其實搵到好嘅股票，我揀中幾隻收息都好好賺啦，點解仲要投資其他嘢喎？

Ed：你淨係買一、兩隻股票係唔得嘅。你數吓，現時有幾多間公司有50年或100年嘅歷史？我喺二○○○年就試過買過一隻叫eToys嘅股票，佢由上市到執笠，加埋都唔夠18個月。

高妹：隻股票一歲半就死咗，好驚呀！不如你教吓我哋點樣分散投資？

Ed：金融海嘯後，我覺得每個投資者都應該尋找一個Super Asset Class（超級資產類別），即係另類投資，好似投資藝術品咁，之前倫敦就有個人形銅像雕塑（Walking Man I）喺拍賣會以8.08億港元賣出。我有朋友就投資哈利電單車，仲喺火炭租咗個場擺放，又有個朋友收藏郵票。

順勢而行 量力而為

莉莉：不過香港人都係鍾意炒股，你講些少炒股心得好啲喎，哈哈！

Ed：世界上有好多事情，係唔可以抱住Hope（希望）嘅心態。我知道香港人好鍾意買高槓桿嘅投資工具，好似窩輪、期權咁，又或者用期指做對沖，其實買乜都好，都要記住：「長短均可，順勢而行，風險控制，量力而為。」

高妹：可惜我哋成日過唔到「心魔」嗰關，睇VIX指數就知，個市一跌我哋就恐慌，升番上嚟就鬆懈。

Ed：我都有畀金錢控制嘅時候，一念之差真係好易做錯事，不過人誰無錯呢？好似我有個朋友去玩Base Jumping（定點跳傘），去到極端危險時候都要識得拉Cue（繩索）。投資亦一樣，長短線都好，你唔會估到下一分鐘恒指點數郁幾多，你估落樓下打機咩？

莉莉：我聽講你仲教人通過「火上行」（Fire Walking）去擊敗投資「心魔」喎！

Ed：「火上行」係指一個人要赤腳走過一條500至900度高溫嘅火炭路，主要訓練我哋將潛意識提升。呢個戶外活動都係畀番啲對沖基金操盤手去做，等佢哋明白點樣化解危機以及做好風險管理。試諗吓，當你連火炭路都走得過，有乜嘢恐懼唔可以克服呢？

分散投資 買乜都好

高妹：你之前講過除咗買股票，買樓亦係好好嘅投資工具。不過，香港地有錢人少，窮人就鬼咁多，我同莉莉都唔敢去諗「安居樂業」喇。

Ed：好遺憾，香港嘅地產市道畀一班人控制住，呢個係問題。不過，你永遠唔會知道乜嘢投資工具會跑出，所以除咗股票，你一定要分散去買其他嘢，即使你只係買個車位都好過冇。好似我呢間辦公室，幾年前幫外國記者協會買咗，依家都升咗一倍。

莉莉：經濟周期有循環係正常事，股災每幾年就爆發一次，其實係乜嘢原因呢？

Ed：貪婪，呢個係幾百年以嚟嘅唯一原因，因為人類內心嘅貪婪係冇得監管。

孖妹成日落證券行都聽到股友話：「散戶永遠都係大戶嘅點心。」Ed好坦白咁講：「大戶有資本利用人工智能嘅工具入市，好似散戶排緊隊做個買盤，大戶都可以安排一條魚游入去個盤路度打尖。當科技高超到咁，一定係大戶做莊嘅贏面比較大。」

41.1%股友首季輸錢

今年首季就快結束，有個別股份已試新高，散戶呢3個月嘅投資成績係點？據今期《東方產經》網上民意調查，截至上周末晚上6時，有34.3%人話有賺，要輸錢嘅有41.1%，而平手及冇入場買股嘅就分別有21.5%及3.1%。

（高妹）（莉莉）

若有料報畀高妹同莉莉或有嘢問，可電郵money.biz@opg.com.hk