美股雖然創咗高位，但走勢相當怪異，連續兩日高開低走。港股受內銀集資消息影響，近期表現弱過藥煲，不過隨着集資計劃落實，有助釋除市場疑慮，再加上美股強勢，恒指上周得以力保21,000點關，明日期指結算，且看大市能否更進一步。
銀建國際（00171）去年底成功引入中國廣東核電集團作為策略性股東，有意向天然資源、能源同埋核能方向發展。內地電廠經過幾年來的艱苦經營後，去年終於交出一份似樣業績，銀建喺行業低潮期內泊到大碼頭，進軍電力行業，可以講係行運行到腳趾尾，剛剛又斥資9.8億元入股一間煤炭企業，應該係大搞前嘅第一波，股價回落至100日線後有支持，上周五反彈，以2.84元報收，暫時以3.5元作為目標，止蝕可以定於2.5元。
古晨