絲絲講場：王石「論盡」誤解「嫩俊」
絲絲一直都唔知萬科地產主席王石原來識講廣東話，佢同絲絲講，話佢早於七七年就喺廣州做嘢，當時有人話佢成日都好「論盡」，佢仲好開心咁以為人哋話佢又「嫩口」又「英俊」添！冇幾耐佢見個同事着咗件新衫返工，佢又想讚個同事後生咗又靚咗，就照辦煮碗話人好「論盡」，點知個同事當場黑面，幾日冇睬佢，事後佢先知自己講錯嘢，都幾搞笑。
講廣東話被彈國語差
時至今日，王石有次嚟香港喺餐廳度用廣東話點菜，仲好流利咁點咗幾款自己好鍾意嘅餸，點不知個侍應笑住同佢講：「先生你啲『普通話』真係講得好差。」佢都唔知好嬲定好笑。
王石嘅老友華潤集團董事長宋林都係北方人，佢嘅廣東話就真係好流利。絲絲就問宋林有乜秘訣，係咪成日睇電視學嘅，宋林話佢喺八十年代入華潤時，喺華潤石化由低做起，當時香港識普通話嘅人唔多，佢成日都喺新界同啲鄉親父老打交道，加上自己喺公餘時間都有上堂，佢啲廣東話就係咁「逼」出嚟嘅。
余絲韻