絲絲講場：冼博德年拎5400萬算奀
今時今日喺歐美做知名「賓卡」一啲都唔易，好似渣打集團（02888）行政總裁冼博德咁，佢要捐320萬美元嘅花紅畀慈善機構；做佢嘅手下反而好啲，渣打執董兼商業銀行行政總裁Mike Rees○九年嘅酬金就有成1,327萬美元，即係超過1億港元，成為渣打最高酬金嘅執董。
商銀CEO搵多成倍
阿Mike去年薪金連福利有66.2萬美元，加埋1,100萬美元嘅遞延股份，仲有160.9萬美元嘅表現股份計劃，加加埋埋就成為最賺錢嘅執董；佢嘅波士冼博德都只係得692萬美元（約5,400萬港元），阿Mike差唔多搵多一倍。其實都有理由嘅，商業銀行係渣打嘅盈利引擎，去年經營溢利增長達36%，喺集團嘅經營溢利中佔逾56%。
睇番我哋祖國嘅「賓卡」，就算係全球最賺錢嘅工行（01398），包括董事長姜建清在內嘅三名高層去年總薪酬就大減逾40%，而中行（03988）嘅四名執行董事薪酬亦減半。比較之下，似乎外資行嘅中高層「賓卡」搵得最多。
余絲韻