絲絲講場：求伯君滑雪上晒癮

日本冇時差雪質又好

金山軟件尋日講業績，求董冇着「老西」，反而一身輕裝。求董其實非常好動，佢話自己最鍾意滑雪，日本、加拿大周圍去，但係咁多個地方之中就最鍾意日本，因為當地雪質好又冇時差，唔同去加拿大，冇啖好食又有時差，啱啱適應咗已經要返屋企。

求董滑雪滑上癮，每年都會滑一、兩次，聽講佢早前都有去北美視察過，唔知有冇順便滑吓雪呢？講到北美，其實金山軟件都有意開拓海外市場，所以求董早前先會去北美，佢仲話當地市場夠大，有興趣開拓添。

金軟投資3億做研發

金山去年賺咗3.87億元（人民幣‧下同），按年增長26%，首席財務官王東暉就話，公司今年計劃推出10隻遊戲，未來3至5年會投資約2億至3億元做研發，去年嘅資本開支約1.4億元，估計今年唔會大幅增加。

余絲韻