絲絲講場：蔣潔敏緬懷上市十載
中石油（00857）喺香港上市唔經唔覺已經十年，董事長蔣潔敏尋日主動提起佢哋上市十周年，諗起當年H股招股價只係1.28元，尋日收市價就有8.82元，相信投資者都覺得好幸福。
當年臨時Logo似微波爐
講開往事真係停唔到口，蔣潔敏回憶起10年前為公司上市做路演嗰陣，公司連一個似樣嘅公司標誌（Logo）都冇，當時嘅投行覺得唔係咁好，公司於是接受投行建議，臨急臨忙整咗一個標誌，佢形容嗰個臨時標誌似足微波爐，即時引嚟哄堂大笑。
約定明年業績會上再見
蔣董繼續話，10年後嘅今日，公司已經有一個設計精美嘅標誌，紅色部分代表石油，黃色代表天然氣，顏色同國旗一樣，佢又話紅色仲可以代表初升嘅太陽，充滿朝氣同活力喎。真係估唔到一個公司標誌背後都有咁多故事。
蔣董被問到最近有關佢將會被調去新疆出任高官嘅傳聞，佢實牙實齒咁話，約定記者喺明年嘅中石油業績會上再見，咁即係否認啦。
余絲韻