市場熱線：中糧注資壯大

利豐可趁調整上車

兩巨無霸表現疲弱，祖國移動（00941）裂口低開74.5元，全日低位徘徊唔識彈，收報74.3元，跌逾1%。大笨象（00005）隔晚在ADR已率先下跌，昨日一度跌穿78元，低見77.85元，收報78.35元，連續三日未能重上80元水平。利豐（00494）派成績表前已偷步落鑊，反而業績公布後見光死，股價急跌一成，在眾多大隻佬中跑第尾。不過利豐受惠環球經濟復甦，加上集團去年把握機會購併，進一步發揮規模效益，古勝認為值得中線投資，可候股價見35元企穩後上車。

至於二奶電話（00762）份成績表差過預期，股價跌逾4%，收報8.84元。集團盈利大幅下跌73%至95.6億元人仔，較孖屐平均預測101.6億元低。不過，「高佬盛」睇好其今年業績，指其3G用客質素高，資本開支大減，作為長線投資，又係搵位上車好機會。

昨日魚缸焦點仲有工行（01398）同中石油（00857）派成績表，前者盈利雖為上市以來增長最低一年，但仍勝過市場預期，多賺16%至1,286.45億元人仔。後者則只及預測下限，賺1,033億元人仔，倒退一成。不過，工行卻出爾反爾，兩會期間話事人講過無集資需要，但昨日公布集資計劃，包括發行人仔CB同攞定牌搞批盪。既然落實融資，反而消除不明朗因素，唔排除在冚倉盤帶動下，工行股價可回升。

農村消費力已提升

西南旱災令祖國唔少地方缺水缺糧，食品價格持續上升，加劇「通脹怪獸」威脅。中糧控股（00606）從事產銷農業產品加工，北大人一直致力刺激內需，農村消費力得以釋放，加上國民購買力提升，在下相信其銷售跟毛利率可穩步上升。另一方面，「山姆叔叔」多次要求人仔升值，即使北大人未有理會，但已表示人仔會按部就班升值，可為中糧帶來潛在匯兌收益。

除咗本身因素，阿媽中糧集團計劃重組旗下業務，可能通過A股公司豐原生化，將集團的生物燃料產業注入中糧控股，但豐原生化份成績表仲要執靚個樣，所以暫時未有具體時間表。另外，阿媽亦研究將零售小包裝食用油業務及小包裝米業務重組，意味中糧今年大把注資機會。

古勝