最近因亞視股權紛爭而曝光率勁高嘅旺旺（00151）主席蔡衍明，佢公司尋日發表最新年報，年報內講述企業文化嘅章節有蔡衍明題字嘅「公司訓」，主要有五大項，包括「確實認識自己」、「切實反思自己」、「隨時提醒自己」、「篤實把握自己」、及「絕對發揮自己」，唔知呢五大「中心思想」，對佢單股權紛爭有冇啟示呢？
至於公司嘅經營理念──「緣、自信及大團結」以及經營指標，除咗可由「旺仔」身體嘅每一部分作解說外，蔡衍明自己亦有題字，睇得出佢應該幾鍾意書法！
旺旺亦好注重企業文化建設，定期舉辦各類增加員工向心力嘅活動，好似唱歌、演講及晨操比賽等。去年公司就搞咗個全集團員工參與嘅「愛生活、愛旺旺」攝影比賽，「旺旺人」以真摰自然嘅照片記錄咗公司嘅人、事、情。年報仲刊登咗兩張得獎作品，其中一張題為《又見旺旺大禮包》，大家都知旺旺大禮包係每年農曆新年最Hit嘅禮品，現已幾乎成為春節嘅代名詞，絲絲從相片中見到一位仁兄攞住大禮包，笑到見牙唔見眼，個幸福同滿足樣真係幾令人感動㗎。
年報亦有披露蔡衍明去年年薪總計為552萬美元（約4,305萬港元），較上一年嘅441.4萬美元多咗25%，主要係因為花紅大增所致。
余絲韻