港股整固，唔上唔落，但詩詩估計個市易升難跌，依家係等內銀股公布業績，若然業績理想，可帶動恒指挑戰21,700點。詩詩所持兩隻股仔靜咗落嚟，又要整固一陣，有盈利在手，繼續再坐。睇番早兩日推介的環境資源（01130），明日公布業績，有風話業績好掂，早段見有盤掃貨，故此在0.103元買入兩球，博上0.12元。
五礦建設（00230）上周五異動，失驚無神升近一成，成交仲鬼死咁大，睇樣就快有好消息公布。同系五礦資源（01208）未開車，下星期出業績，隨時好似五礦建設咁突然爆上。
睇番五礦資源本身以氧化鋁貿易業務為主，是內地最大型的氧化鋁供應商，預計公司可受惠氧化鋁價格上漲以及資源整合。唔計今年有可能再獲注資的因素，五礦資源都有條件見4元，若稍後再有大型注資，股價更有機會翻一番。現價買入，止蝕定在2.77元。
詩詩