孖妹缸湖遊：碳交易之父教你環保創富

排放權買賣拓新「錢」途

「碳交易」即係將空氣中嘅溫室氣體當商品嚟買賣，事緣九七年各國喺日本簽署《京都議定書》，規定先進國家喺二○一二年前，6種溫室氣體嘅整體排放量要比九○年減少5.2%。之後各國政府向企業發放排放許可證，若企業由於成本和時間問題而超出碳排放上限，可向碳排達標及願意出售排放權嘅企業購買「溫室氣體排放權」，呢類交易買家主要包括電廠、煤廠及重工業，有時會利用價格波動嚟賺取差價獲利。

本身係教授出身並曾擔任芝加哥期貨交易所嘅首席經濟師及副總裁桑德爾，睇中呢個投資機會，喺九十年代着手研究呢類產品交易，喺○三年成立全球首家嘅芝加哥氣候交易所（CCX），負責結算交易，充當保證人角色。

CCX起初只有14名成員參與，依家會員超過200家公司，但只有5家來自中國內地。○八年碳交易市場非常活躍，但○九年起熱潮開始冷卻，喺去年底嘅哥本哈根氣候會議，中國承諾提早喺二○一二年前將碳排放目標縮減40%，令碳交易再次受到注目。

新能源投資產品綜合化

Sandor：「碳交易之父」桑德爾

莉莉︰有人話第三次工業革命係「低碳經濟」，新能源有朝一日會否取代傳統能源？

Sandor：我好鍾意沙特阿拉伯石油部長亞瑪尼（Sheikh Yamani）講過嘅一句話︰「石器時代嘅終結並唔係因為我哋用晒啲石頭。」為咗解決氣候變化嘅問題，新科技應運而生，而值得開心嘅係，市場要求不斷創新，呢個精神可推動更多環保產品，改善我哋嘅綠色生活。

高妹︰散戶成日吼實太陽能股及風電股嚟炒，咁邊一類會成為新能源業嘅主流？

Sandor：太陽能、風能、水能……我認為將所有類別夾埋一齊，就可帶領新能源業發展。我哋嘅氣候交易所提供廣泛嘅環保相關投資產品，包括各項碳排放、酸雨及再生能源嘅合約買賣。

進軍內地設氣候交易所

莉莉︰哪一類地球資源係最珍貴？

Sandor：我相信喺地球上，空氣和水係最寶貴嘅資源，我哋一直尋找各種金融創新嘅方法，並達到經濟效益及保護環境嘅目標，呢個係一個挑戰，亦係一個機會。

高妹︰所以你近年主攻中國市場，最新係喺天津開設氣候交易所（TCX），你認為內地碳排放交易市場做成點？

Sandor：內地企業非常支持呢個項目，目前有30多家公司簽署成為會員。我哋可以與中石油（00857）和天津市政府合作，發展碳排放嘅電子交易平台，TCX已開始實施試點，一些金融產品包括限制二氧化硫及水污染物嘅排放權可公開拍賣，提高能源效益之餘，並配合中央國策。

莉莉︰但內地碳交易成交始終未見活躍，何解呢？

Sandor：開發新市場，時間和挑戰一定存在，最重要係中國和香港要發展自己獨特嘅碳交易方法。

內企攻新能源先研減排

高妹︰若港交所（00388）成立碳排放交易所，你有冇興趣入股？

Sandor：我哋唔會放過任何新機會，但唔會猜測未來嘅投資項目。

莉莉︰內地企業想成為新能源業龍頭，要具備乜嘢條件？

Sandor：將來環境趨向低碳世界，企業想成為行業龍頭，就要愈早採用減排技術，首先通過嚴格核查，知道本身廠房用最少成本可以減排多少，之後確定長期嘅投資，與業界分享實踐經驗，整個過程其實可製造更多工作機會。

高妹︰作為「碳交易之父」，你嘅綠色生活係點㗎？

Sandor：我做嘅嘢同其他環保人士一樣，加上成日要周圍飛，飛機會直接將碳排放落臭氧層，所以喺日常生活上，我會盡量循環再用，喺辦公室使用設有感應器嘅燈等。

莉莉︰你係第一個創作碳排放交易系統嘅人，創意係點樣嚟？

Sandor：我本身對買賣股票及期貨有興趣，由於之前嘅工作與金融有關，先可以發明呢個系統開拓新市場。創作過程一啲都唔容易，今時今日同樣有好多挑戰，所以創作人要有耐性及遠見，必須堅持下去。

樓價貴 78.6%人頂唔順

由人口統計學角度嚟睇，孖妹相信碳排放交易最終有市場，人口數目與所產生嘅二氧化碳只會有增無減，與樓價一樣愈嚟愈貴。依家市區樓嘅入場費普遍升到200萬元以上，有幾多人可以負擔得起？據今期《東方產經》網上民意調查，截至上周末晚上6時，78.6%嘅人話負擔唔到，只有21.4%人話能夠負擔。

高妹、莉莉

若有料報畀高妹同莉莉或有嘢問，可電郵money.biz@opg.com.hk