「跌的跌不了，升的升不了」，港股仲係牛皮大悶局，上個禮拜五恒指只得130點波幅，又係悶戰一場。市況持續牛皮，打擊咗鑊鏟友嘅信心，再加上中央立心打擊央企囤地嘅消息，令加息之說不逕而走，連帶近日熱炒嘅股份，上個禮拜五都腳仔軟軟，周末仲要傳出印度加息，都為今日大市帶來一定壓力。古晨覺得，如果大市高位咁厭悶，倒不如痛快地一次過跌夠佢，等大家有機會入平貨仲好過。
自去年起內地汽車業大復甦，隨着「汽車下鄉」嘅推行，汽車股紛紛飛天，相對落後嘅重汽（03808）有得諗。早前集團公布旗下重汽濟南頭兩個月銷售就激增咗65%，估計隨着政策力度加大，今年盤數都應該幾靚仔。去年汽車股大炒，但重汽炒炒吓喺一月初突然玩急插，股價又跌番去起步位，估值較其他汽車股更吸引，近期股價似有捲土重來之勢，一於博佢上番12.5元，止蝕不妨考慮8元。
古晨