市場熱線：重機貨源歸邊

呢個星期繼續有唔少藍色大隻佬派成績表，焦點將會落在三間紅色錢莊，以及兩大石油巨頭身上，相信會左右本地魚缸去向。古勝對紅色錢莊成績表仍具信心，雖然不良貸款及其他問題貸款上升，將對紅色錢莊盈利帶來壓力，但其良好的財務狀況應足以抵禦。去年貸款增長30%，今年估計亦可再增20%，而未來兩年不良貸款及其他問題貸款比率將維持低於10%。

由於不良貸款及其他問題貸款有潛在大增機會，將在未來數年成為紅色錢莊的最大挑戰。古勝相信北大人將採取不同措施減慢信貸增長，估計紅色錢莊可保持足夠盈利能力、合理的不良貸款率和合適資本率，可令壞帳保持在受控水平。

電力設備股隨時發圍

今年兩會政策繼續支持發展新能源，但一眾新能源股卻只係短暫落鑊，甚至有個別具概念的新能源股備受忽視，其中電力設備股幾乎被缸邊友遺忘，好似重慶機電（02722）幾乎原地踏步，但古勝相信重機可受惠經濟復甦，前景值得睇高一線。

雖然重機去年的盈利倒退11%，表現較曳，但其毛利率達17.8%，為眾多電力設備股中最高。至於重機的一○年預測市盈率11倍，預測市帳率只有0.81倍，則為電力設備股當中估值最低。另一方面，兩會定出最新一個5年經濟發展國策，其中振興大西北經濟及基建均為主要議題，料重慶機電可大展所長。加上公司已上市超過兩年，今年將會是注資年，阿媽背景雄厚，股東包括重慶市人民政府、重慶市國資委、重慶機電控股、重慶渝富資產管理、重慶建工及中國華融資產管理等，可以話大把好嘢等住注入重機。

咪睇重機平時成交唔多，實情係貨源歸邊，目前股價較高位只低約一成，蟹貨有限，只要有老利消息配合，升勢一觸即發。

古勝