絲絲講場：1881時間球塔重新啟動
時下興講保育，長實（00001）旗下嘅古蹟重置項目「1881」自去年開幕後，亦成為好多香港市民及遊客必到嘅景點，絲絲仲記得1881前身係水警總部，總部內有5座歷史建築物，包括水警總部主樓、馬廐、前九龍消防局主樓、前九龍消防局宿舍及時間球塔，當中時間球塔有乜嘢乾坤就完全唔知。
130年歷史 為船隻報時
長實尋日就特別邀請咗香港天文台助理台長梁榮武，聯同1881嘅建築師凌顯文及項目經理陳漢成，主禮及見證逾百年歷史嘅時間球塔重新啟動儀式，並由天文台科學主任親自向在場一眾小朋友講解時間塔嘅典故。
原來呢個塔建於一八八○年初，而自一八八五年一月一日起，除周日及公眾假期外，每日都會由人手將時間球升起，向途經嘅船隻提供報時服務，以及依時間去準確計算船隻嘅位置，不過隨着一九○七年時間球被移師到尖沙咀訊號山後，時間球塔嘅歷史任務便結束。
余絲韻