絲絲講場：滙豐賀迪文11月榮休
喺亞洲金融風暴期間，賀迪文（David Hall）由渣打過檔獅子銀行做公關阿頭，佢好早之前話退休，拖吓拖吓又一年，今勻真係可以退休去歎世界嘞。
滙豐日前出咗內部通告通傳所有同事，賀生十一月就會正式榮休，通告大事表揚佢過去十二年來嘅貢獻，任內佢曾服務過三位亞太區主席、五位亞太區行政總裁，咁有經驗嘅人要離開，好多人會掛住佢。
至於邊個接手賀生嘅職務，呢個都唔係乜嘢新聞，事關喺傳媒未有任何報道前，市場一早就傳係一位同樣來自渣打，名叫Cindy Tang嘅女將接棒。
渣打公關阿頭接棒
通告中亦提到Cindy將於七月正式上任，佢來頭唔小，原為渣打亞太區嘅公關阿頭，主管團隊橫跨國際人數達一百五十人，曾工作地點包括亞洲、中東及倫敦等。佢生於台灣，先後喺澳洲、新西蘭、菲律賓及美國接受教育，不論工作或成長都令佢涉足不少國家，今次獅子銀行羅致到咁具國際經驗嘅公關人才，真係佢哋之福，不過對渣打嚟講就係一大損失喇。
余絲韻