乜嘢叫做股東「用腳嚟投票」？最新案例係泰豐國際（00724），由公司兩日前公布買入施勳道豪宅倚巒起計算，泰豐股價兩日之內跌咗21.8%，市值計就唔見咗8億幾，以公司買入倚巒嘅作價2.8億元計，呢兩日泰豐唔見咗嘅市值，足足可以買多3個倚巒物業（打通埋都幾過癮）。好明顯，投資者唔Buy呢項投資。
對於市場咁嘅反應，唔知班管理層有乜感覺呢？不過，至少泰豐依家都叫做創出咗亞洲區豪宅洋房呎價最高紀錄，多咗好多人認識佢哋啦。
其實喺公布收購前，佢哋嘅股價已跌咗兩日，即係4日加埋跌咗27.5%。
之前中移（00941）因為入股浦發行而被市場鬧佢哋「不務正業」，都係畀股東「用腳嚟投票」，搞到股價跌咗唔少，要董事長王建宙罕有地四出解畫，股價先有番些少支持，中移就話為國賣命，咁泰豐為乜呢？
余絲韻