中信泰富（00267）○九年全年業績變番靚仔，皆因搞掂咗投資外匯巨額虧損嘅陰霾，曾經強調冇打算沽清中信泰富股權嘅前主席榮智健，喺業績公布後嘅第二日，趁股價做好減持咗4,285萬股，套現8.16億元，都算幾和味。去年五月榮太子曾減持中信泰富，當時佢話係因為自己要成立新公司有資金需求，唔通榮太子今次套現又大搞作？
榮太子嘅減持行動喺聯交所網站曝光，佢喺三月十一日即係中信泰富公布業績後嘅第二日，分別以平均價19.627元喺場內減持285.2萬股，以及喺場外以每股19元減持4,000萬股，兩單「刁」分別套現5,597萬及7.6億元，佢喺中信泰富嘅持股量就由9.45%降至8.27%。對於榮太子嘅減持行動，中信泰富一於例牌咁話榮太子本人已離開公司，所以唔會畀任何評論。
榮太子喺去年四月離開中信泰富之後冇幾耐，就喺五月透過大摩向市場配售6,000萬股，套現7.32億元，大家都預咗佢會沽清中信泰富股權，但當時榮太子喺公開場合話睇好中信泰富前景，冇諗過全數沽清，只係為咗搞新公司有資金需要啫；佢當時仲話，第日間新公司喺業務上好希望與中信泰富合作添。事隔10個月，榮太子揀咗喺呢個時候再沽中信泰富，唔通佢間公司有乜嘢大Project要搞？
余絲韻