港股經過多日悶局後，昨日終於有新方向，美國退市憂慮大減，道指再逼近去年高位，落後甚多嘅港股自然發力追番上去。至於近期熱炒嘅殼股，尋日終於要回一回氣，古晨就覺得係好事，事關炒得太癲會出事，有正常回吐整固，咁先長炒長有。
去年獲大股東注入水泥項目，從而變身做水泥股嘅昌興國際（00803），本來在新業務刺激下，前途一片光明，點知去年底內地話水泥出現產能過剩，搞到個個見水泥股就質，昌興亦由0.8元插水落番0.4元。雖然話市場唔睇好水泥行業前景，不過台泥（01136）就好睇好昌興嘅水泥業務，更出價成38億元去收購。昌興成功賣仔套現，當然飲得杯落。
近期單刁準備完成，昌興收錢之餘股價亦有一番刺激，尋日上番0.5元之上，炒味再現，不妨跟進一番，話唔定隨時炒上0.65元都唔定，止蝕位不妨設在0.46元。
古晨