預咗無意外驚喜，前晚匯市焦點依然集中在聯儲局議息結果上，主席伯南克在會後聲明重申，美國維持超低利率一段時間，同過去幾次議息聲明無大分別。伯南克強調經濟雖然開始脫離谷底，惟就業市場未有起色，通脹仍溫和，聯儲局會維持0至0.25厘超低利率以配合經濟復甦需要。
從聲明中，筆者體會到兩大重點，一、聯儲局恐怕不會在市場預期前，提早加息。二、我們距離加息之日，應該仲有相當漫長嘅日子。聯儲局聲明，有意將美息的調升時間表，同就業及通脹數字幾時抽升掛鈎，事實上畀到匯市股市投資者，更理想嘅參考指標。
自○八年九月，雷曼兄弟宣布返魂乏術，聯儲局大手減息，將聯邦基金利率由2厘減到0至0.25厘水平，期間美國失業率由6.2%惡化去到10.1%，現在數字稍有改善，企在9.7%，財長蓋特納前晚提出預警，估計就業市場受惠經濟復甦前，未來幾個月仍有再掉頭惡化之可能，如果聯儲局以就業回升作為加息指標，今年底前加息機會唔到一半。
前日議息後，美匯指數重返80水平樓下，打破近兩個月在80至81.3之間橫行的悶局。筆者最睇好歐元兌美元直盤，希臘剛通過縮減48億歐元赤字預算，把赤字由佔GDP的12.7%控制到佔GDP的8.7%，評級機構標普把希臘從負面信貸評級中剔除，歐元區總算成功拆除第一個炸彈。再睇歐元就希臘危機，今浪兌美元從1.46跌到最低1.3461，近期在1.3461至1.3770有營造圓底反彈之勢，配合美匯走弱，歐元有條件重返1.40至1.4220，最樂觀甚至去到1.4576，現在入市值博率頗大，即使睇錯，於1.3550止蝕，損失相對有限。
阿Lam