一場海嘯令西方元氣大傷，滙控（00005）東移決心昭然若揭，除咗去年高調宣布將CEO辦公室搬嚟香港，其坐落於上海嘅新建中國總部大樓亦會喺今年上半年正式開幕，為配合呢項盛事，滙控○九年度嘅撮要版年報就用咗新建中國總部大樓做封面，大樓旁邊仲有啲大廈未起好，張相嘅前端見到兩名工人，成個構圖靚唔靚就見仁見智，但絲絲估計佢哋用得呢幅相，一定有佢哋嘅用意。
滙控為咗重振聲威，講明未來重點策略會放喺發展中嘅新興市場，可能想話畀人知佢哋貫徹策略，走到一個喺度發展緊而又極為重要嘅新興市場——中國，就準備就緒喺度大展拳腳。
講到金融危機，滙控主席葛霖話吸取咗教訓，應該給予監管機構一啲工具，逐步影響由銀行流入經濟嘅信貸供應；佢又話滙控正與英國監管當局傾緊集團需要邊一種企業遺囑復原計劃。滙控去年末季喺美國揼咗31萬美元，就金融監管改革等進行游說工作，但比起金融海嘯高峰期只係小數目。
余絲韻