絲絲講場：敦沛拉大隊遊蘇梅島
呢幾日溫度又跌番落十幾度，搞到絲絲鬼咁想去泰國曬吓太陽。敦沛金業副總裁李卓峰（Jerff）話，過幾日就會與一班同事去泰國蘇梅島玩番四日三夜，絲絲真係恨到流口水。
細問之後，絲絲先知道原來每年三、四月，敦沛管理層都會贊助兼帶領敦沛旗下各業務部門主管去外地旅行，Jerff仲好開心咁話：「我參加公司嘅旅行團已經有6次喇，去過4次泰國，1次台灣同1次日本。」
李卓峰建議揸金
一班同事去旅行會唔會好悶呢？Jerff話：「其實成班同事去旅行除咗可以增進感情，某程度上都算係換個地方傾公事。話晒都係離開辦公室，大家喺輕鬆嘅環境下，平時收埋喺心入面嘅說話都會易啲講出來。」
難得見到Jerff，絲絲當然要問吓金價走勢，佢話：「今年金價會跑贏，美元及金價今年會罕見地同步上升，我建議投資者可以揸黃金，沽歐元及英鎊，或者投資貴金屬產品，而第一、二季金價會喺每安士1,080至1,200美元區間上落。」
余絲韻