真係瘦田冇人耕，耕開有人爭，去年停牌兼已委任臨時清盤人嘅福記食品（01175）早前公開招標，隨即掀起一場爭奪戰，最先由香港資源（2882）主席黃英豪夥拍譚魚頭創辦人譚長安競投，跟住殺出由天行國際（00993）股東蔡朝暉夥拍真功夫創辦人蔡達標及華脈無線通信（00499）組成嘅財團；冇幾耐黃英豪嘅財團又話搵嚟美心集團創辦人伍沾德家族嘅旗艦投資公司，滿以為勝券在握，但日前黃英豪方面承認落敗，市場亦傳出中糧集團勝出，點知中糧集團董事寧高寧尋日喺北京大大聲否認，話佢哋冇參與競投喎。
絲絲初時仲以為蔡朝暉牽頭嘅財團贏咗，不過尋日下午絲絲收到一份由蔡朝暉、蔡達標及華脈所發出嘅聲明，雖然聲明冇白紙黑字寫明話佢哋輸咗，但就四圍多謝人，包括「自己」、財務顧問花旗及福記嘅臨時清盤人，最後佢哋仲恭喜中標人士添。
咁就奇嘞，依家只係有人出嚟認輸，但就冇人出嚟話贏咗，呢單無頭公案真唔知點審好。後來絲絲聽到個古仔，話原來臨時清盤人已鎖定咗與一家中資公司進行獨家洽商，冇得傾嘅就知道自己輸，但有得傾嘅亦未必一定贏，所以解釋到至今只有人輸而冇人贏嘅情況，聽落絲絲覺得幾合理。
余絲韻