絲絲講場：維他奶賀壽「祝奶」
絲絲近期喺電視睇到維他奶廣告，原來唔經唔覺維他奶已有70年歷史，佢哋尋日仲搞咗個「Friend祝70年」慶祝會，恭祝維他奶70年前誕生，絲絲都有去捧場。維他奶（00345）執行主席羅友禮話，好高興維他奶陪伴港人七十載，與港人度過唔少溫馨快樂時光，佢同其他高層祝酒時，仲破例以維他奶代替香檳，變成「祝奶會」。
70款包裝賀70周年
除咗維他奶高層外，畀面出席慶祝酒會嘅賓客真係好多，絲絲見到新地（00016）副主席郭炳江一邊喺塊簽名板簽名，一邊畀記者影相，望落有啲似明星參加宣傳活動嘅指定動作。
今次嘅慶祝酒會上，維他奶特意推出70周年共70款「個個祝」嘅包裝設計，仲有播放過去維他奶嘅經典廣告。羅友禮話維他奶喺一九四○年三月九日面世，嗰陣佢仲係細路哥，父親羅桂祥為咗推出一種大豆健康飲品，研製咗維他奶，第一日只係生產咗9支。佢最難忘係一九七二年爆發石油危機，商品價格飆升6倍，產品銷滯，當時為咗刺激銷售就突破傳統，首次推出維他奶紙盒裝，結果證明策略好成功。
佢回想起過去維他奶嘅口號，最深刻係七十年代嘅「維他奶，點止係汽水咁簡單」，而今年維他奶口號係「Stand by me」，廣告就以Sell溫情為主。
余絲韻