絲絲講場：永隆出75周年紀念冊

永隆喺一九三○年由伍宜孫創辦，一九三三年正式開業，當時仲叫做永隆銀號，員工只有12人，屬於小規模經營，而且初期資金短絀，又未有特別信譽做到，經營得相當吃力，賺到嘅錢真係有血有汗，好彩多得其他本地銀行行家提攜，先可以令業務擴展。

家人共事好普遍

已經退休嘅永隆匯兌部經理譚耀棠憶述當年，話永隆名副其實係大家庭，因為好多同事當中有父女、夫妻、兄弟姐妹咁，總之與家人喺永隆一齊做嘢係好普遍嘅。

伍氏家族後人伍尚修話，自己喺家族入面最年輕，○七年之前都喺外資行工作，對永隆認識反而唔算多，不過佢依家係永隆企業傳訊部高級經理，絲絲諗佢應該對銀行摸熟晒啦！

余絲韻