金融經驗豐富嘅唐雙寧最近出咗本叫《上下求索‧危機觀察》嘅書，集結咗佢對○八年美國次按危機引起全球金融海嘯嘅睇法及心得，呢本書輯錄唐總由○七年四月至○九年十二月期間應邀參加論壇發表嘅演講，共有五十一篇文章。
唐總以前係中國銀監會副主席，佢嘅真知灼見有唔少人想睇。老友話唐總起呢個書名係有佢嘅要求及想法，「上下求索」係出自古代愛國詩人屈原名作《離騷》入面有句「路漫漫其修遠兮，吾將上下而求索」，即係話喺追求真理方面，前面嘅路仲好漫長，但係我將會百折不撓咁上天下地去追求探索，睇嚟唐總幾有憂患意識。
老友仲話其實唐總真係幾有才華，佢除咗係金融專才，又寫得一手好靚嘅毛筆字，佢仲對詩詞歌賦好有心得，成日都出口成章，又好鍾意研究哲學，早兩年佢同高盛董事長見面，就送咗佢嘅書法集，對方好驚訝，估唔到佢藝術造詣咁高。唐總話藝術家及銀行家都有樣共通點，就係兩類人都懂得哲學喎，絲絲真係要好好參透吓先。
余絲韻