現今企業唔單止要賺錢叻，仲要講社會責任同埋改善環境，好似平保（02318）近期就啟動咗「低碳100行動」計劃，推出綠色金融產品，仲透過無紙化措施每年慳番成2億張紙，以A4紙嘅重量計足足有成8.72噸，慳錢之餘又環保，一舉兩得。
平保呢100項低碳改善行動，66項屬於日常辦公，14項屬於採購，12項屬於業務環節，仲有8項就係結合本身業務而推出嘅綠色金融業務，包括推出環境污染責任險，呢項保險去年保費收入有500萬元人民幣，有次中石化集團出現事故，平保仲派專家去幫手檢查有冇污染。
早喺呢項措施之前，平保已整合後勤資源，提升營運效率，透過唔同措施，平保就可以喺核保、核賠呢啲流程上每年慳番超過2億張紙，平保又透過電子化，將寄畀客戶嘅信件減少咗100萬封咁多，用少啲紙，營運成本都低啲。
余絲韻