唔經唔覺內地推出3G已經一年有多，但數據顯示，內地嘅3G用戶仍然唔多，除咗電訊商班阿總頭痕外，工信部班官員亦想盡辦法刺激3G嘅使用率，所以經常都見到工信部嘅領導們發聲支持。工信部部長李毅中尋日又發功推介3G，話希望廣大消費者熟悉3G、會運用3G，令生活更加多姿多釆。
不過席間李部長又倒自己米，原來佢自己仲係用緊2G機，佢解釋話用緊嘅2G機仲好好用，唔捨得換機喎，佢仲話平時用手機都只係講吓電話，冇乜精力去玩其他功能。呢頭叫人多多運用3G，嗰頭又話自己用電話只係通話為主，點叫人去用3G呢？呢位部長真係老實得可愛。
講到老實，李部長同場仲自爆年薪只得14萬人仔添，佢話自從○三年離開中石化（00386）加入國資委後，月薪就只有5、6千蚊人仔，而且一直都冇加人工，所以去年收入與○三年一樣喎，唔知會唔會影響部長花錢換手機都要再三考慮呢！
余絲韻