絲絲講場：美聯冧莊奪「恒基金牌」
發展商與物業代理嘅關係猶如兄弟，啲樓賣得好唔好，物業代理嘅角色好重要，恒地（00012）深明此道，所以年年都會獎勵成績好嘅代理。尋日終於到咗論功行賞之時，今次依然係由美聯集團（01200）「冧莊」，取得○八及○九年的「恒基金牌」大獎，原來連同今次，該集團已經連續6年衞冕，至於同系嘅香港置業亦攞到○八及○九年「恒基金牌」B組嘅冠軍。
四叔親自嘉許頒獎
佢哋銷售恒地旗下新盤成績咁好，美聯集團主席黃建業好開心，聯同美聯及港置一眾管理層出席頒獎禮，恒地主席李兆基仲親自到場嘉許及頒獎，以肯定美聯及港置喺過去一年嘅努力。
黃建業更預測後市，佢話虎年樓市仍向好，二手樓價仲有得升。港置行政總裁李志成亦話，睇唔到熱錢有明顯流出香港嘅迹象，今年樓市會繼續升，即係樓市仲享受緊牛市嘅繁榮。
余絲韻