理文造紙（02314）首席執行官李文俊間廠喺內地，成日留喺內地好正常，不過佢話今年以嚟真係忙得交關，事關喺經濟復甦嘅大環境下，佢哋嘅造紙生意好旺，機器日日開足24小時至掂，新年期間又有啲員工放假，所以佢惟有同細佬拍檔，親身上廠睇實業務。
佢話細佬年三十至年初三都喺內地，而佢自己就成日都中港兩邊走，真係好忙，計絲絲話，做生意嘅嘢梗係愈忙愈開心啦，咁先會財源滾滾來，李文俊亦胸有成竹咁話，今年業績肯定好理想，重返海嘯前水平絕無難度。
絲絲都知佢有好多公職在身，屋企有兩個囝囝加上老婆大緊肚，佢點樣分身呢？李文俊就話幾忙都好，總會抽啲時間陪家人，至於公職佢亦絕不放棄，會用私人時間去做，希望唔係簡單捐錢了事，而係可以親力親為，用自己嘅營商經驗，真正幫到一啲殘疾人士改善佢哋未來生活，事關佢係康復諮詢委員會副主席。
余絲韻