絲絲講場：周文耀花紅＝1年人工
港交所（00388）尋日公布成績表，前行政總裁周文耀退休前特別獲發嘅一份花紅金額亦曝光，佢喺○九年度嘅花紅達780萬元，相等於佢一年嘅年薪，令到佢○九年度薪酬總計高達1,709萬元，較○八年度薪酬總計1,382萬元（花紅佔390萬元）多出23.6%，周文耀今次退休可謂「滿載而歸」。
報告亦顯示，周文耀今年一月一日至十五日嘅薪酬共有489萬元，當中包括薪金、假期薪酬、保險費、會籍及退休福利支出等。心水清嘅人應即刻諗到，佢原本喺今年四月中先退休，依家提早3個月退休，所以應該有唔少假期薪酬呢！
至於現任行政總裁李小加，佢喺去年十月加入港交所，○九年度薪酬就有259.3萬元，並沒有表現花紅；報告暫時亦見唔到佢有任何認股權。
增設董事開會「車馬費」
最估唔到係連主席夏佳理及一班非執行董事都有人工加，今年二月港交所薪酬委員會建議，主席本年度人工由45萬元增至50萬元，即加薪11%，而非執董亦由30萬元增至35萬元，即加薪16.6%；另建議增設董事開會嘅「車馬費」，董事出席會議每次酬金為2,500元。有關建議係根據恒指成分公司及海外上市交易所非執董平均年度酬金而釐定，旨在將過去3年保持不變嘅非執董酬金拉近至市場水平，並要喺今年四月二十二日嘅股果大會表決。
經濟環境好轉，港交所員工今年平均加薪3%，可以講係皆大歡喜，難怪港交所僱員流失率只有3%。
余絲韻