市場熱線：珠管逆市突圍

祖國移動頹勢持續

下半場本地魚缸跌幅擴大，早段已腳軟的紅色錢莊，午後跌勢持續，本來早段甚為硬淨的本地錢莊，午後亦倒跌。恒指一度跌逾400點，散場收報20,575點，跌301點或1.4%，國企指數跌2.2%或273點，收報11,775點，現貨場成交額增至626億元。

上海浦發錢莊在祖國魚缸高掛免戰牌，確認祖國移動（00941）正洽購其股權。雖然唔少大行對呢件事睇法甚為正面，加上入股銀碼唔算太大，又唔會影響派息，可惜其股價連續第三日下跌，昨收報72.85元，跌2.4%。不過，亦有大行指祖移不務正業，今年預期增加派息的憧憬幻滅，唔多睇好呢次入股計劃。

大笨象（00005）早段彈彈吓，可惜不敵魚缸跌勢，終倒跌0.5%。渣打（02888）則升5.6%，除「高佬盛」唱好外，「最信」則上調其目標價至234元。

金管局出口警告，指個別本地錢莊實在太「大方」，制訂住宅按揭貸款利率過低，講到尾都係為咗搶生意。既然金管局開到口，本地地主都要抖抖，股價跌0.5%至1%不等。

人行副行長表示，由於祖國上半年經濟仍存在不確定因素，寬鬆貨幣政策暫維持不變，但在適當時候，或會再上調存款準備金率，又或者請「息魔」出手。呢番言論代表阿爺隨時閂水喉，再加上查數消息，紅色錢莊幾乎全線下跌，只有民行（01988）逆市升1.2%。交行（03328）在眾大隻佬中排尾二，跌3.5%，收報8.27元，建行（00939）跟中行（03988）分別跌2.9%及3.4%。

雖然昨日本地魚缸表現偏軟，但兩隻油管股表現出色，勝利管道（01080）升6.1%，收報1.72元，珠江鋼管（01938）則升4.8%，收報4.75元。若以股論股，古勝認為珠管可睇高一線。

產品毛利率勝同業

集團主營石油及天然氣管生產，其中以製銷直縫焊鋼管及電阻焊鋼管為主，特別是直縫焊鋼管含技術性相當高，亦不屬反傾銷產品類別，所以其產品的毛利率遠勝同業。珠管去年毛利率達22%，較前一年上升2%，遠遠拋離同業的10%。

珠管亦是少數能為中海油（00883）提供海上輸油管產品的公司，加上已開拓中東市場，海外市場將成為未來盈利增長動力。由於去年底珠管招股時，本地魚缸整體投資氣氛欠佳，歐洲又爆「歐豬五國」事件，珠管只能以下限4.5元定作招股價，預期市盈率不足10倍。以行業普遍15倍預測市盈率計算，合理價為6.75元，打番個九折，6元點都見得到。

古勝