本文重點
尋日五個經紀組織（證券商協會、證券學會、證券及期貨業職工會、網上經紀協會、專業財經分析及評論家協會）喺港交所（00388）舉行聯合春茗，咁啱大市尋日升咗400幾點，都算為春茗助興。搞手之一嘅蔡陳葆心喺上台致詞時亦有感而發，話要成功搞好一個活動已經好難，五個會合作就難上加難，大家都要抱着互諒互讓嘅態度，亦要承擔煩瑣嘅統籌及實務工作。佢話「五會春茗」係好值得，因為可團結起來，五大會共有6,000幾位會員，可以唔使啲嘉賓走幾場係好值得推廣嘅事。唔知經紀業協會及中資證券業協會明年會唔會考慮一齊參加聯合春茗呢？
超級粉絲唔睇派息
尋日滙控（00005）公布業績，雖然遜於預期，但身為超級fans嘅蔡太就力撐滙控，佢話滙控係世界級銀行，生意有上有落並唔出奇，對滙控非常有信心，亦唔會介意派息多少。
佢係滙控長期擁躉，七十年代已開始買滙控，「收集」咗好多年，期間嘅公司行動佢從沒理會，亦早已轉咗自己名下擺明「長揸」。
去年滙控進行世紀供股，並曾於收市競價時段急插至33元，佢話自己冇喺當時「撈底」咁幸運，但都喺40元左右買咗過萬股，亦有參與供股行動。依家滙控由低位反彈唔少，但佢仍冇打算沽出獲利。
余絲韻