年屆80歲嘅老牌富貴經紀、眾利股票公司主席董偉近年迷上京劇，尋日大笨象公布業績，絲絲即刻打畀佢問佢點睇？點知就「摸門釘」。絲絲唔記得咗董偉依家每逢周一、周三港股收市後，就會請京劇名家范文碩老師帶備京胡到眾利公司授課，夜晚7點至落堂，絲絲喺電話度亦有幸再一聽董偉嘹亮嘅京腔。
「破百」放番多少
其後絲絲等佢落堂再打畀佢，佢劈頭一句「嫌佢（滙控）派得息少囉」中氣十足，佢笑言上緊堂，冇乜點睇滙控業績，亦唔擔心股價下跌，重申佢同公司揸咗滙控幾十年，去年供股都悉數認購，賺咗好多，未來如果「破百」會考慮放少少獲利，若回跌就再買做長線投資喎。
余絲韻