天氣濕熱跑慢咗

今年渣打馬拉松參賽人數及送院人數都破晒紀錄，「地獄賽道」威力唔係講笑，Eddie今年嘅成績都有啲受影響。Eddie同絲絲講，話佢用咗三小時五十多分鐘先完成全馬賽事，較往年平均用三小時二十至三十分鐘慢咗成半個鐘，主因係天氣太濕太熱，以及新路線有較多上斜位。不過佢話今年大會安排都唔錯，新路段有新鮮感，風景又靚，只係昂船洲大橋一段嘅氣味唔太好。

雖然今年成績麻麻，但Eddie都睇得開，話參賽並唔係要攞獎，能夠完成都可以接受嘞，而佢未來嘅目標係喺三個鐘頭內完成全馬，絲絲希望佢早日願望成真喇。

余絲韻