人稱「小金王」嘅胡經昌其實丁點架子都冇，亦風趣幽默，佢話大家對佢有太多「美麗誤會」，自己都係打份工。佢唔會浪費食物、會由灣仔行路落中環……最得孖妹欣賞嘅係，佢訪問前會做足功課，唔單只重睇《華爾街》，睇到重要情節時會「pause」再筆錄對白。胡經昌喺八七年七月當選證券業協會（前稱證券經紀業協會）主席，佢笑說當時全世界股市蓬勃，以為份工係「Easy job」，估唔到香港八七年十月會「當災」。

細說《華爾街》貪心屬正常

高妹︰點解當時會構思包場請業界人士睇呢套講內幕交易嘅戲？

胡經昌︰發生股災後，八八年八月一齊睇呢套戲，其實協會會定期舉辦會員活動，可能見到套戲與證券業有關，所以包咗新華戲院個場畀會員欣賞。

莉莉︰中國人唔主張貪心，講求安貧樂道，戲中就十分強調，「貪心」係推動經濟發展嘅原動力，你覺得係咪每個人都有貪念呢？

胡經昌︰電影中有唔少對白都好語重心長，好似「Greed is right」、「Greed works」和「Greed terrifies」。我就覺得「Greed is normal」，一個人貪心係正常嘅，話自己唔貪心一定係講假話，重點係如戲中所講︰「How much is enough？」所以「貪心」唔係錯，但如果因為貪心而做犯法嘅事，咁就一定係錯誤。

高妹︰你自己做生意或投資有冇貪念？

胡經昌︰我投資好保守，事實上「貪」和「貧」只係一線之間，將呢兩個字拆解，「貪」字有「今」，「貧」字有「分」，如果今日貪得太過分，「過咗條線」就變成貧。

賺錢勿行差踏錯

莉莉：不過，如果做投資時唔夠貪心，咁好難賺到大錢喎？

胡經昌：電影中有提到「Zero win game（零和遊戲）」，即係話有人贏錢就一定有人輸錢，問題係啲錢點樣轉換。只要你用心去睇呢套戲，就會發現當中有好多非法行為嘅情節出現，亦有好多「警告」去提醒你唔好行差踏錯。

高妹︰見到有人贏錢，散戶都變得好心急入市，點先可以控制貪念？

胡經昌︰我一直謹記老竇教落兩個道理，別人贏錢，唔好「恨」人哋搵到咁多，更加唔好不擇手段賺錢；別人輸錢，亦唔好踩人，火上加油根本幫唔到人。

暢談港股 股災見真情

莉莉︰每經歷一次股災，你得到最大嘅感受係咩？

胡經昌︰我都算「好彩」、命水好，碰啱股災呢啲精彩嘅嘢。八七年股災，細經紀包括華人經紀卻可以助港股一臂之力，香港市場好獨特。當年大跌市特別影響期指，槓桿大加上揸重倉，引發追收孖展潮，當知道客人冇錢補倉時，細經紀會情深義重幫客人填數，因為佢哋明白當一個倉冧咗之後，就會「骨牌效應」式，整冧埋上面千萬個倉，正因為咁，當動盪或危機出現時，細經紀嘅存在有助分散風險，支撐香港股市。

阿Q精神看海嘯

莉莉︰金融海嘯對你有咩影響？

胡經昌︰客人輸錢，身家自然縮水，不過股災嚟到始終控制唔到，你可以話我「阿Ｑ精神」。記得二○○○年做立法會議員嗰陣，有份修訂《證券及期貨條例》嘅細節，亦係最先提出「一業兩管」有問題，即係銀行證券業歸金管局管，證券行就歸證監會，表面上冇問題，但兩套監管條例嘅尺度其實唔同。當時有同立法顧問傾過，建議銀行證券業務成立一間附屬公司或有限公司，畀證監管理，不過始終要銀行肯合作。我唔敢講「一業兩管」關雷曼迷債事，亦都唔想喺發生咗嘅事上再講。

高妹︰你覺得人生最重要係咩？

胡經昌︰快樂，有錢嘅人買唔到，冇錢嘅人都買唔到，要快樂就視乎自己心態。

散戶籲知足常賺

踏入三月係業績期，散戶預計大市通常會做好，問佢哋覺得自己投資算唔算貪心，大多人話怕輸錢所以唔會貪心。炒股有廿年經驗嘅散戶Ellie話，自己並唔係一個貪心嘅人，平時賺400蚊都會沽貨走人，佢有朋友就試過一隻股票賺四萬蚊都唔願走，最尾輸番晒，所以做咩投資都好，唔好太過貪心，要學識知足，所以Ellie每逢入市，就一定會問自己究竟可以蝕幾多錢。

《華爾街》講啲乜？

上集《華爾街》講述一名年輕人Bud Fox（Charlie Sheen飾演）喺股票行任職經紀，為了攀附股票大亨Gordon Gekko（Michael Douglas飾演），於是做出犯法行為去獲取內幕消息，目的係得到更好職位和金錢。幸好Fox最後良心發現，協助警方將Gekko繩之以法。

即將喺四月全美上映嘅下集《華爾街：金錢永不睡眠》，主要講番大鱷Gekko正式出冊，希望可以在金融界東山再起，更與一名年輕華爾街證券交易員聯夥，企圖提醒金融界人士，正有一場危機風暴即將到來。

（高妹）（莉莉）

若有料報畀高妹同莉莉或有嘢問，可電郵money.biz@opg.com.hk