本文重點
一年一度最令香港投資者引頸以待嘅滙控（00005）同恒生銀行（00011）業績，喺嚟緊嘅星期一就會公布，不過佢地嘅員工最關心應該係加人工同分花紅嘅結果，對員工而言當然係大日子。
絲絲收到風，今年經營環境好咗咁多，恒生派花紅亦更手爽，聽講第一級即係表現最好嘅級別，有7至8個月花紅，比上年最多都係3.5個月好得多。
金融海嘯之後，銀行界花紅成為市場焦點。絲絲發現，普羅市民隨時注視銀行家發嘅花紅多過銀行盈利，皆因歐美銀行搞到天下大亂，問股東同納稅人集資之餘，有好多銀行家仍靠分紅坐擁巨資呼風喚雨。
較○七年仍有距離
不過好彩香港銀行一向無咩事，雖然畀金融海嘯影響咗經營環境，但係以恒生為例，不但唔需要集資，仲要維持派息，上年最多都係得3.5個月花紅，聽講今年環境好番啲，分花紅情況好好多，第一級花紅有7至8個月人工，第二級有4至5個月人工。雖然好過上年，不過相比○七年時最多14個月，仲係爭好遠。
余絲韻